साउन १६,काठमाडौं — फिल्म ‘रे’ को अफिसियल ट्रेलरलाई युटुबमार्फत सार्वजनिक गरिएकोे छ ।
यस फिल्मको ट्रेलरमा प्रेम र एक्सन दुवैलाई समेटिएको छ । काठमाडौं, भक्तपुर र ललितपर जिल्लामा हुने तीन मुख्य जात्रामा आधारित रहेर उक्त फिल्म निर्माण गरिएको छ । काठमाडौं उपत्यकामा मनाइने विभिन्न जात्रा र त्यससँग सम्बन्धित अलौकिक शक्ति, एक्सनका साथै सामाजिक प्रेमकथामा आधारित रहेर फिल्मको निर्माण गरिएको हो ।
फिल्मका मुख्य कलाकार सुनिल थापाले डनको भूमिका निर्वाह गरेको देखिन्छ । उनले ‘हिरो होइन भिलेन हो भिलेन, त्यो पनि ‘राते काइँला’ भन्दै उक्त ट्रेलरमा बोलेको देख्न सकिन्छ । सुनिललाई ‘राते काइँला’ उपनामले नै चिनिने गरिन्छ । ट्रेलरमा धेरै जसो एक्सन सिनहरुलाई देखाइएको छ ।
दिनेश पौडेलद्धारा निर्देशन फिल्ममा सुनिल थापा, दिवस धिताल, सुजाता थापा, पूर्णिमा लामा, क्रान्ति रसाईली, रक्षा गुरागाईँका साथ अभिषेक जोशी लगायतका कलाकारहरुको अभिनय रहने छ । फिल्ममा किशोर खतिवडाको विशेष भूमिका समेत रहेको छ ।
सगुन फिल्मसको ब्यानरमा निर्मित फिल्मलाई श्री राम बालाजी फिल्मस् ले वितरणको जिम्मा लिएको छ । कुमार श्रेष्ठको द्वन्द्व निर्देशन, ओम सुनारको संगीत, कविराज गहतराजको नृत्य निर्देशन रहेको फिल्मलाई राजेन्द्र त्रिपाठीले निर्माण गरेका हुन् ।
फिल्म यहि साउन २४ गतेबाट प्रदर्शनमा आउने भएको छ ।