साउन ७, काठमाडौ– आफुहरुका मागप्रति सरकार बेखबर बनेको भन्दै देशभरका महिला स्वास्थ्य स्वयंसेविकाहरु आन्दोलनमा उत्रने चेतावनी दिएका छन् । सरकारले आफ्नो बजेटमा महिला स्वास्थ्य स्वयंसेविकाहरुका मागहरु कही कतै पनि नसमेटिएको भन्दै उनिहरु रुष्ट भएका हुन । नेपाल स्वास्थ्य स्वयंसेवी संघले आज रिपोर्टर्स क्लव नेपालमा पत्रकार सम्मेलनको आयोजना गरी आफ्ना नौं सुत्रिय माग सरकार समक्ष राखेको छ । महिला स्वास्थ्य स्वयंसेविकाले महिनामा दुई हजार पाउनु पर्ने,वार्षिक भत्ता २४ हजार रुपैया, सेवा छोड्दा काम गरेको प्रत्येक वर्षको १० हजार रुपैयाका दरले एकमुष्ट रकम पाउनु पर्ने , स्वास्थ्य विमा हुनु पर्ने, पोशाक भत्ता १५ हजार पाउनु पर्ने, चाडबाडं खर्च बाफत १० हजार रुपैया पाउनु पर्ने लगायतका नौ सुत्रिय मागहरु रहेको संघकी अध्यक्ष साबित्री मैनाललिे जानकारी दिईन । आफना जायज मागहरुप्रति सरकार गम्भिर नभए साउन २३ गते देखि आन्दोलनमा उत्रने अध्यक्ष मैनालीले बताइन । उनका अनुसार साउन २३ गते स्वास्थ्य मन्त्रालयमा धर्ना दिने , भदौ ५ गते स्वास्थ्य मन्त्रालय र अर्थ मन्त्रालय घेराउ गरिनेछ । यति गर्दा पनि सरकारले आफ्ना मागहरुप्रति कुनै सुनुवाई नगरे सडक तताउन बाध्य हुने उनको भनाई छ । महिला स्वास्थ्य स्वयंसेविकाहरुले हाल भिटामीन ए, पोलीयो थोपा र आइरन चक्की बाड्ने तथा बाल रोग, एकिकृत व्यवस्थापन, मातृ सुरक्षा चक्की, कण्डोम, पिल्स र पुनर्जलीय झोल ,चक्की बितरण गर्ने, गर्भवती तथा सुत्केरी महिलाको स्याहार, क्षयरोग, कुष्ठरोग, औलो, खोप, लगाएतका सरकारका ८१ वटा स्वास्थ्य सेवा दिईरहेका छन ।
