भाद्र ९,काठमाडौं — काठमाडौ जिल्लामा साढे ४४ हजारभन्दा बढी मतदाता थपिएका छन् । जिल्ला निर्वाचन कार्यालय काठमाडौंको तथ्यांकअनुसार काठमाडौं महानगरपालिकासहित १० स्थानीय तहमा ४४ हजार ७ सय ५७ मतदाता थपिएका हुुन । काठमाडौं जिल्लामा स्थानीय तह निर्वाचनको समयमा ५ लाख ५९ हजार ४ सय मतदाता थिए । अब काठमाडौंमा ६ लाख ४ हजार १ सय ५७ मतदाता पुगेका छन् ।
जिल्लाभरिमा एक जना तेस्रोलिंगी, २० हजार ८० पुरुष र २४ हजार ६ सय ६७ महिला मतदाता थपिएका छन् । कागेश्वरी मनोहरामा ३ हजार ९ सय ३४, कीर्तिपुरमा १ हजार २ सय ५८ र गोकर्णेश्वरमा ३ हजार १ सय १७ जनाले मतदाता नामावलीमा नाम दर्ता गराएका छन् ।
यो समाचार आजको कान्तिपुुर दैनिकमा छापिएको छ।
चन्द्रागिरि र टोखा नगरपालिकामा क्रमशस् ३ हजार ७ सय ४२ तथा ३ हजार ६ सय ९८ को नाम मतदाता नामावलीमा थपिएको छ । तारकेश्वरमा ३ हजार ४ सय १८ जनाले निर्वाचन आयोगले दिएको समयमा मतदाता नामावलीमा नाम दर्ता गराए । दक्षिणकाली र नागार्जुनमा क्रमशस् १ हजार ६ सय ८९ र ४ हजार १ सय २ जना मतदाता थपिएका छन् । शंखरापुर नगरपालिकामा नयाँ थपिएका मतदाताको संख्या २ हजार १ सय ३ छ ।
काठमाडौं जिल्लाबाहिरका ३७ हजार २० पुरुष, २८ हजार ५ सय २१ महिला र ४ जना तेस्रो लिंगीले मतदाता नामावलीमा नाम दर्ता गराएका छन् । बुढानीलकण्ठ नगरपालिकामा मतदाता नामावली संकलनको समय सकिइसक्दा पनि नाम दर्ता गरिरहँदा वडा नं. ९ का अध्यक्ष, स्थानीय एमाले नेता र आयोगले खटाएका प्राविधिक शनिबार राति पक्राउ परेका थिए । बुढानीलकण्ठ नगरपालिकामा जारी तालाबन्दीले तथ्यांक आइनसकेको कार्यालयकी प्रवक्ता शान्ति बोगटीले बताइन् । एकपक्षीय रूपमा जथाभावी नाम दर्ताको काम गरेको भनेर कांग्रेस र माओवादी केन्द्रले निर्वाचन कार्यालयमा उजुरी दिएका छन् । आयोगले साउन १६ देखि ३२ सम्म स्थानीय तह र जिल्ला निर्वाचन कार्यालयमार्फत मतदाता नामावलीमा नाम दर्ता, अद्यावधिक र त्रुटि सच्याउन समय दिएको थियो । समय थप्नुपर्ने देखिएपछि भदौ ३ सम्म समय थप गरिएको थियो ।