वैसाख ९, काठमाडौ–समावेशी सञ्चार अभियानले पत्रकार महासंघको विधान संशोधन नगरिए महाधिवेशन नै अवरुद्ध गरिदिने चेतावनी दिएको छ । अभियानले आज राजधानीमा पत्रकार सम्मेलन गरेर नेपाल पत्रकार महासंघको सबैखाले संरचनामा महिला, दलित, आदिवासी, जनजाति, मधेशी, अपांगता भएका व्यक्ति तथा सीमान्तीकृत समुदायको अर्थपूर्ण सहभागिताका लागि महासंघको वर्तमान विधान संशोधन गरिनु अनिवार्य भएको भन्दै संशोधन नगरिए महाधिवेशन नै अवरुद्ध गरिदिने चेतावनी दिएको हो । अभियानका संयोजक एवम जागरण मिडिया सेन्टरका अध्यक्ष रेम विश्वकर्माले नेपाल पत्रकार महासंघ सााच्चिकै समावेशी हुनुपर्ने भन्दै त्यसका लागि महासंघको वर्तमान विधान संशोधन नगरिए आन्दोलन गरेर महाधिवेशन नै अवरुद्ध बनाइदिने बताउनुभयो । नेपाल पत्रकार महासघंलाई पूर्ण समावेशी बनाउनका लागि समावेशी सञ्चारको पैरवी गर्दै आएका विभिन्न सञ्चारसम्वद्ध संघसंस्थाहरुद्वारा समावेशी विधान संशोधनका लागि २०७० चैत्र १९ गते महासंघ समक्ष प्रस्ताव दर्ता गरिसकिएको छ । नेपाल पत्रकार महासंघको महाधिवेशन वैशाख २० र २१ गते काठमाण्डौंमा हुादैछ ।
