माघ २२, काठमाडौं – नेपाली सिने बजारमा अहिले चलचित्र ‘सेल्फी किङ’को राम्रै चर्चा छ । आगामी शुक्रबारबाट प्रदर्शनमा आउने यो चलचित्रले चलचित्र प्रचारका क्रममा नेपालको पपुलर एप हाम्रो पात्रोसँगको सहकार्यमा ‘हाम्रो सेल्फी किङ कन्टेस्ट’ घोषणा गरेको थियो । ह्युमर र कमेडी हाउभाउमा खिचिएको सेल्फीमा आफ्नो तस्विर खिचेर इच्छुक सहभागीहरुले हाम्रो कम्युनिटी मार्फत आफ्नो सेल्फी पोष्ट गर्न सक्ने व्यवस्था गरेको थियो ।
माघ ५ देखि माघ २० सम्म संचालित प्रतियोगिताको विजेताको घोषणा माघ २१ गते हाम्रो पात्रो मार्फत गरिएकोछ । एपको एज मार्फत लाइभ आएर अभिनेता विपिन कार्की र निर्देशक विशाल सापकोटाले विजेता घोषणा गरेका हुन् । प्रतियोगितामा सहभागीबाट इटहरीका दीवस पोखरेल विजेता बनेका छन् ।
दीवससँगै अन्य १० प्रतियोगीले प्रिमियरको १० पास जितेका छन् । पहिलो भएका दीवसले कलाकार तथा निर्देशक अनुप बरालको एक्टर्स स्टुडियोमा ३ महिनाको अभिनय तालिमको छात्रवृति पाएका छन् ।
विशाल सापकोटाले निर्देशन गरेको चलचित्रको कथा पनि उनकै हो । दिनेश राउत र सुवास थापाले संयुक्त रुपमा निर्माण गरेको चलचित्रमा विपिन कार्कीले शिर्ष भूमिकामा रहेर अभिनय गरेका छन् ।