माघ १३, काठमाडौं – सिन्धुपाल्चोक, जुगल गाउँपालिका -४ बाट १ थान भरुवा बन्दुक र करिब ५० ग्राम बारुद सहित ५० वर्षीय मेन दोर्जे स्याङ्वो पक्राउ परेका छन ।
बन्दुक र बारुद बोकी हिँडिरहेको अवस्थामा स्याङ्वोलाई आइतबार साँझ प्रहरीले पक्राउ गरेको जनाएको छ । प्रहरी चौकी तेम्बाथानबाट खटिएको प्रहरीले उनलाई फेला पारी पक्राउ गरेको हो ।
यसैगरि रुपन्देहीको बुटवल उपमहानगरपालिका-१२ तामनगरस्थित चारपाला सामुदायिक वनमा लुकाई छिपाई राखेको १ थान भरुवा बन्दुक आइतबार दिउँसो प्रहरीले बरामद गरेको छ । उक्त स्थानमा बन्दुक लुकाई छिपाई राखेको भन्ने खबर प्राप्त हुनासाथ नयाँ गाउँबाट खटिएको प्रहरीले सो बन्दुक बरामद गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।