पुस ९, काठमाडौं –पूर्वपश्चिम राजमार्ग अन्तर्गत सप्तरीको सुरुङ्गा नगरपालिका–२ स्थित कदमाहामा मंगलबार यात्रुबाहक बसले मोटरसाइकललाई ठक्कर दिँदा एक जनाको मृत्यु भएको छ भने एक जना गम्भीर घाइते भएका छन् ।
राजविराजबाट लहानतर्फ आउँदै गरेको ना २ ख १२६९ नम्बरको बसले लहानबाट कदमाहातर्फ जाँदै गरेको ना ६५ प ९०४५ नम्बरको मोटरसाइकललाई ठक्कर दिँदा मोटरसाइकल चालक सिरहा लक्ष्मीपुर पतारी गाउँपालिका–३ निवासी ३५ वर्षीय अरुणकुमार साहको मृत्यु भएको प्रहरीले जनाएको छ ।
दुर्घटनामा परी गम्भीर घाइते भएका साहको लहानस्थित सप्तऋषि नरसिंह होममा उपचारका क्रममा मृत्यु भएको जिल्ला ट्राफिक प्रहरी कार्यालय सप्तरीले जनाएको छ । सोही दुर्घटनामा परी मोटरसाइकलमा सवार १७ वर्षीया कल्पना साहको लहानस्थित सप्तऋषि नरसिंह होममा उपचार भइरहेको जनाएको छ ।