मंसिर १६, काठमाडौं – बलात्कारको आरोप लागेका सिद्धबाबा भनिने कृष्णदास गिरीलाई प्रहरीले पक्राउको गरेको छ। विराटनगरस्थित विराट नर्सिङ होमको आइसियूमा भर्ना भएको अवस्थामा नै सोमबार बिहान उनलाई पक्राउ गरिएको हो ।
सुनसरीका डिएसपी विनोद शर्माको टोलीले उनलाई बिहान करिब ४ बजे पक्राउ गरेको हो। बिहानै जिल्ला प्रहरी कार्यालय सुनसरीका डिएसपी बिनोद शर्मा नेतृत्वको प्रहरी टोली अस्पताल पुगेको थियो ।
उनलाई आइतबार दिउँसो ह्दयघात (हार्टअट्याक) भएको भन्दै आइसियूमा सारिएको थियो । तर बिहान पुनस् भक्तजनसँग भेटघाट गर्न थालेपछि प्रहरीले उनलाई नियन्त्रणमा लिइ सुनसरी ल्याएको हो ।
गिरीलाई नियन्त्रणमा लिँदा अस्पताल प्रशासनले विरोध गरेको थियो। स्वास्थ्यस्थिति सामान्य नहुँदै प्रहरीले नियन्त्रणमा लिएको भन्दै चिकित्सकहरुले विरोध जनाएका थिए। उनलाई आजै सुनसरी जिल्ला अदालतमा म्याद थपको लागि लगिने बताइएको छ ।
सुनसरीको चतरास्थित आश्रमका सिद्धबाबामाथि एक महिलाले बलात्कारको आरोप लगाएकी थिइन्। महिलाको उजुरीपछि थप अनुसन्धानका लागि उनलाई पक्राउ गरिएको हो । गिरिमाथि कात्तिक ४ गते एक महिलालाई बलात्कार गरेको आरोप लागेको छ । आफूलाई भेट्न बोलाएर चतरास्थित आश्रममै बलात्कार गरेको आरोप ती महिलाले लगाएकी थिइन् ।