असार ३, काठमाडौं – विश्वकप क्रिकेटमा भारतसँग हार बेहोरेपछि पाकिस्तान क्रिकेटमा अशान्ति छाएको छ ।
हारपछि कप्तान सरफराज अहमद र खेलाडीहरूले कडा प्रश्नको सामना गर्नुपरेको छ । 
विश्वकपमा पाकिस्तान अहिले अफगानिस्तानभन्दा मात्र माथि छ । उसले सेमिफाइनलमा स्थान बनाउने सम्भावना लगभग सकिएको छ ।
त्यसमाथि चिर प्रतिद्वन्द्वी भारतसँग हारेपछि पाकिस्तानी खेलाडीहरूबीच विवाद सार्वजनिक भएको छ । सरफराजले वरिष्ठ खेलाडीहरूको सल्लाहलाई बेवास्ता गरेको भनी आलोचना भइरहेको छ । उनको फिटनेसका विषयमा पनि प्रश्न उठेको छ । म्याचमा क्रममा उनले हाई काढेको तस्वीर भाइरल बनेको थियो ।
आइतवार म्यानचेस्टरमा भारतसँग हारेपछि सरफराजले कडा प्रश्नको सामना गरे । तीव्र गतिका बलर मोहम्मद आमिर ड्रेसिङ रूममा भएका परिवर्तनबाट खुशी नभएको प्रश्नमा सरफराजले भने, ‘त्यस्तो हैन । सबै ठीक छ ।’
टीम हारेपछि सरफराजले आमिरलाई मिडियाको सामना गर्न भनेको भए पनि उनले नमानेको कुरा सार्वजनिक भएको थियो ।
शोएब मलिक र मोहम्मल हफीज जस्ता वरिष्ठ खेलाडीलाई सरफराजले बेवास्ता गरेको आरोप छ । भारतविरुद्धको खेलमा उनीहरूलाई एक एक ओभर मात्र फ्याँक्न दिइएको थियो । तर सरफराजले टीममा पाँचजना विशेषज्ञ बलर उपलब्ध रहेको पनि निर्णयको प्रतिरक्षा गरे ।
त्यसबाहेक सरफराजले पाकिस्तानका प्रधानमन्त्री इमरान खानको सल्लाह पनि बेवास्ता गरेको आरोप छ । खानले टस जितेमा ब्याटिङ गर्न सरफराजलाई सल्लाह दिएका थिए । सरफराजले यसमा सफाइ दिँदै भने, ‘पानी पर्ने सम्भावना थियो तर हाम्रा बलरहरूले परिस्थितिको फाइदा उठाउन सकेनन् ।’
खेलाडीहरूले टीमको आदेश पालन नगरेको रिपोर्ट पनि पाकिस्तानी मिडियामा आएको छ । रिपोर्ट आएपछि पाकिस्तान क्रिकेट बोर्डले यो सत्य नभएको भनी स्पष्टीकरण दिएको छ ।
एजेन्सी