बैशाख २०, काठमाडौँ – कानून, न्याय तथा संसदीय मामिलामन्त्री शेरबहादुर तामाङले अनलाइन पत्रकारितालाई कडाइका साथ अनुगमन र नियमन गर्नु पर्ने बताएका छन् । न्युजलाइन मिडिया प्रालिको प्रथम वार्षिकोत्सव समारोहमा मन्त्री तामाङले मुलुकमा धेरैजसो अनलाइन खबर अनुमानका आधारमा चल्ने गरेको भन्दै चिन्ता व्यक्त गरे । उनले तथ्यपरक सूचनाका आधारमा समाचार प्रवाह गर्न सुझाव पनि दिए ।
पाठकलाई आकर्षित गर्ने नाममा अस्वस्थ प्रतिस्पर्धा गर्ने, मृत्यु नै नभएका राष्ट्रवादी नेताको नाम जुराएर मृत्युको अफवाह फैलाउने, व्यक्तिगत स्वार्थका आधारमा व्यक्तिको चरित्र हत्या गर्ने जस्ता कार्य गर्ने अनलाइन तथा त्यसका प्रकाशकलाई कारबाहीका लागि आवश्यक कानून बनाएर पनि दण्डित गरिने उनले बताए ।
मन्त्री तामाङले मुलुकमा भ्रष्टाचार न्यून गर्ने, सुशासन कायम गर्ने, स्थानीय तह देखि नै विकास निर्माण कार्यमा स्थानीय समुदायलाई सहभागी बनाउने कार्य सरकारको प्राथमिकतामा रहेको बताए । निर्वाचन अगावै गठबन्धनले जनतासँग गरेका प्रतिबद्धता पूरा गर्न वर्तमान सरकार दृढ रहेको उनको भनाइ थियो । मिडियाका अध्यक्ष तथा कार्यकारी सम्पादक राजु भट्टले कृषि, पर्यटन, ऊर्जा, व्यापार लगायतका विषयलाई आधार बनाएर सञ्चालन भइरहेको न्युजलाइनले सही र सत्यपरक सूचना प्रसारण गर्दै आएको जानकारी गराए ।
रासस