जेठ ३१ । राष्ट्रिय जनता पार्टीले आह्वान गरेको तराई बन्दको आज दोस्रो दिनपनि प्रदेश नम्बर दुईका जिल्लाको जनजीवन प्रभावित भएको छ ।
यसैक्रममा रौतहटको गौरस्थित सिसुवाचोकमा प्रहरी र बन्द आह्वानकर्ता राजपाबीच झडप भएको छ । झडपमा एक प्रहरी जवान घाइते भएका छन् भने राजपाका तीन कार्यकर्ता पक्राउ परेका छन् । झडपका कारण सिसुवाचोकको अवस्था तनावग्रस्त भएको छ । मोर्चाका कार्यकर्ताहरुले प्रहरी सवार भारतीय नम्बरको गाडी तोडफोड गर्दा झडप भएको हो । झडपमा घाइते प्रहरी जवानको एउटा हात भाँचिएको छ । घाइते प्रहरी जवानको नाम खुलाइएको छैन । मोर्चाका तीन जना कार्यकर्ताहरुलाई नियन्त्रणमा लिएर जिल्ला प्रहरी कार्यालय गौरमा राखिएको छ । पक्राउ पर्नेहरुमा रामेश्वर यादव, कमलेश सिन्हा र बच्चा यादव रहेका छन् ।
गौरको सुरक्षा व्यवस्था कडा पारिएको छ । सशस्त्र प्रहरी र नेपाल प्रहरीको तैनाथी बढाइएको छ । म्यादी प्रहरीहरुलाई पनि सुरक्षामा परिचालन गरिएको छ । चुनाव बहिस्कारको निर्णय गरेको राजपाले चारदिने बन्द आह्वान गरेको छ । बन्दको दोस्रो दिन रौतहटको जनजीवन प्रभावित भएको छ ।
