साउन १६,काठमाडौं – काठमाडौंदेखि पश्चिमी क्षेत्रमा अधिक वर्षा हुनसक्ने भन्दै त्यसक्षेत्रमा अझै केही दिन सतर्कता अपनाउन मौसमविद्ले सबैसँग आग्रह गरेका छन्। जल तथा मौसम विज्ञान विभागका महानिर्देशक डा। ऋषिराम शर्माका अनुसार मनसुनको न्यून चापीय रेखा अझै नेपाली वायुमण्डलमा सक्रिय भइरहेकाले नेपालका पश्चिमी भेगमा भारी वर्षा हुनसक्ने प्रवल सम्भावना अझै रहेको छ। जसले गर्दा त्यसक्षेत्रमा बाढी, पहिरो र डुबानको समस्या अझै आउनसक्ने देखिएकाले सबैले सतर्कता अपनाउन जरूरी छ ।
गत एक हप्तायता देशभर वर्षाको वितरण एकनाश भए पनि शनिबार रातिदेखि आउँदो सोमबारसम्म बढी सक्रिय हुने विद्यमान मनसुनको स्थानीय प्रणालीले कुनै क्षेत्रमा मात्र बढी पानी पर्ने खण्डवृष्टि हुने सम्भावना रहेको छ । एकै स्थानमा अधिक वर्षा हुँदा त्यो स्थानमा बाढी, पहिरो तथा डुबान हुनसक्ने भएकाले स्थानीय बासिन्दाले सचेत र सतर्क रहन विभागले आग्रह गरेको छ।
गत शुक्रबार रातिदेखि देशभरमा भारी वर्षा हुँदा करिब ८० जनाले ज्यान गुमाएका छन् भने २४ भन्दा बढी व्यक्ति बाढी र पहिरोमा परी बेपत्ता भएका छन् । करोडौँ मूल्य बराबरको भौतिक संरचना, अन्य सम्पत्तिको नोक्सानी भएको छ । बिहीबार साँझबाट नेपालको मध्यभागमा मौसम केही सफा भए पनि शुक्रबार रातिदेखि शनिबार बिहानसम्म नेपालको पूर्वी र पश्चिमी भागमा वर्षा भएको विभागले जनाएको छ ।
जल तथा मौसस विज्ञान विभाग मौसम पूर्वानुमान महाशाखाका मौसमविद् शान्ति कँडेलका अनुसार शनिबार रातिदेखि पूर्वी भेगमा आकाश अलि सफा देखिए पनि काठमाडौँदेखि पश्चिमका क्षेत्रमा भने अझै भारी वर्षा हुनसक्ने अवस्था टरेको छैन । शनिबार रातिदेखि काठमाडौँदेखि पूर्वका पहाडी र हिमाली क्षेत्रमा आकाश सफा रहे पनि तराईमा भने केही वर्षा हुनसक्ने बताइएको छ ।
पश्चिम नेपालमा विशेष गरी महाकाली, कर्णाली नदी र त्यसका सहायक नदी लगायत पश्चिम राप्ती, भेरी, बबई, कालीगण्डकीदेखि नारायणी नदीसम्म बाढी र डुबानको दृष्टिले निकै संवेदनशील स्थान मानिन्छन्। त्यसैले तत्काल विपद्सम्बन्धी यथेष्ट र भरपर्दो सूचना आम नागरिकले पाउन सकून् भन्ने उद्देश्यले विभागले टेलिफोन तथा मोबाइल प्रदायक संस्था नेपाल टेलिकम र एनसेलसँग सम्झौता गरेको छ।
विभागका महानिर्देशक डा। शर्माले बढी खतरापूर्ण देखिएका नदी प्रणालीमा विपद्सम्बन्धी सूचना हामी एसएमएसमार्फत् आम सर्वसाधारणसम्म पुर्याउन त सक्छौँ, विभागले पठाएको सूचना अनुसार स्थानीय बासिन्दा सचेत हुनसके क्षति न्यूनीकरण हुनसक्ने बताए।
पश्चिमी भेगमा भारी वर्षाको सम्भावना, सतर्क रहन अनुरोध
