नेमकिपा निकट वकिलहरुद्वारा बारको निर्वाचनमा उम्मेद्वारी घोषणा

फागुन १९,भक्तपुर– आगामी चैत्र २० गते हुने नेपाल बार एशोसियसनको निर्वाचनका लागि नेपाल मजदूर किसान पार्टी निकट कानून अध्ययन समाज नेपालले आज उम्मेदवारी घोषणा गरेको छ ।
समाजले भक्तपुरको रफत संचार क्लबमा आयोजना गरेको पत्रकार सम्मेलनमा उम्मेदवारी घोषणा गरेको हो ।
बार एशोसियसनको निर्वाचनमा समाजका अध्यक्ष एवं अधिवक्ता रामप्रसाद प्रजापति अध्यक्षमा, नरहरीनाथ योगी(बाँके) महासचिवमा र सदस्यहरुमा मदन श्रेष्ठ(काठमाण्डौ), शिवराज दाहाल(दैलेख) ले उम्मेदवारी दिने भएका हुन् ।
उम्मेदवारी घोषणा गर्दै अध्यक्ष प्रजापतिले विगत लामो समयदेखि प्रजातान्त्रिक समूह र प्रगतिशील समूहले पालैपालो नेपाल बारको नेतृत्व गरेपनि बारलाई प्राज्ञिक थलो बनाउनुको सट्टा भागवण्डाको थलो बनाएको आरोप लगाए ।
केन्द्रदेखि जिल्लासम्म विदेशी दातृ निकायबाट प्राप्त बजेटमा समेत भागवण्डा गर्ने, अपारदर्शी ढंगले बजेट सिध्याउने र नियुक्तिमा समेत पक्षपात हुने गरेको आरोप लगाउँदै उनले बारलाई निष्पक्ष, पारदर्शी बनाउँदै कानून व्यवसायीको क्षमता अभिबृद्धि गर्न आफूहरुको उम्मेदवारी रहेको बताए ।