यो पटक गौतमको निर्णय क्षमता कमजोर देखिएकोमा आलोचना भइरहेको छ। पहिले गृहमन्त्री हुँदा जुन क्षमता र साहस उनमा थियो त्यो अहिले नदेखिएको बताइएको छ। उनले सम्हालेको मन्त्रालयभित्र प्रहरी, सशस्त्र प्रहरीदेखि प्रमुख जिल्ला अधिकारीहरूको सरुवा बढुवामा समेत गौतम कमजोर देखिएको एमाले वृत्तमा चर्चा छ। गृह मन्त्रालयलाई गति दिन नसकेको र कमाण्ड गर्न नसकेको चर्चा उनको बारेमा चलेको छ।
एआइजीपीको बढुवामा स्वयम् गृहमन्त्रीले ब्रिफकेस बोकेको आरोप लगाउने रमेश खरेललाई कारबाही गर्नुको साटो आकर्षक ठाउँमा सरुवा गरिदा गौतम निरीह बनेका छन्। ‘या त उनले अब यो अन्तिम पटक हो भनेर जे आउँछ त्यही पचाउने र आफू केही पनि नगर्ने योजना बनाए या त उनको क्षमता खस्किएकै हो’ स्रोतले भन्यो। गृहमन्त्री बनाउन बाह्य शक्तिले शुरुदेखि नै नरुचाएका गौतमका लागि अब सहज दिन छैनन्।
गौतमको निवासमा उनका छोरा हरिशसँग चिनियाँ भाषामा कुरा गर्दै चिनियाँ कुटनीतिज्ञहरूको आवतजावत बारम्बार भइरहेको विषयलाई पनि भारतीयहरूले नरुचाएको चर्चा चलेको छ। गौतमको परिवार पछिल्लो समयमा उनलाई सफल बनाउने भन्दा पनि अब यही हो अन्तिम मौका भन्दै लामो हात गर्नतिर लागेको स्रोतको दावी छ।
एमालेबाट स्वास्थ्यमन्त्री खगराज अधिकारी, उर्जामन्त्री राधा ज्ञवाली र कृषि मन्त्री हरि पराजुली पनि फालिने लिष्टमा रहेको स्रोतले जनाएको छ। उनीहरूको ठाउँमा क्रमशः सोमनाथ प्यासी अधिकारी, शान्ता मानवी र बलराम बाँस्कोटाको नाम एकाएक चर्चामा आएको छ। बामदेवकै कारण दशैंअघि कांग्रेसका चार र एमालेका तीन मन्त्रीको जागिर थामिएको स्रोतले जनाएको छ। विक्लीनेपाल