गोदावरी भिलेज रिसोर्ट पुनः सञ्चालन

भाद्र ३०, काठमाडौ–व्यवस्थापन र मजदुरबीच झन्डै तीन महिना लामो विवादपछि ललितपुरस्थित गोदावरी भिलेज रिसोर्ट पुनः सञ्चालनमा आएको छ। मजदुरले राखेका मागमध्ये तीनवटा पूरा गर्न व्यवस्थापन सहमत भएपछि रिसोर्ट खुलेको हो।व्यवस्थापन पक्षबाट माग पूरा नगरिएको भन्दै त्यहाँ कार्यरत मजदुरले गत असार ९ बाट रिसोर्टमा काम बन्द गरेका थिए। मजदुरको निर्णयलगत्तै पर्सिपल्ट व्यवस्थापनले पनि रिसोर्टको मूलगेटमा सूचना टाँसेर सबै कोठामा तालाबन्दी गरेको थियो। त्यसयता मजदुर शान्तिपूर्ण धर्नामा बसेका थिए। व्यवस्थापनसँगको वार्ता पनि टुंगोमा पुग्न सकेको थिएन।’मजदुरसँग भएको वार्ता सहमतिमा टुंगिएपछि रिसोर्ट सञ्चालनमा आएको छ,’ रिसोर्टका बिक्री प्रबन्धक सुशीलकुमार अर्यालले आइतबार नागरिकसँग भने, ‘मजदुरका मागमध्ये तीनवटा पूरा गर्ने सम्झौता भएपछि उनीहरू काममा फर्किएका छन्।’