संसदीय सुनुवाइ समिति को वैठक जारी

जेठ ५, काठमाडौ–संसदीय सुनुवाइ विशेष समितिको बैठक आज पनि बसिरहेको छ । समितिको कार्यालय सिंहदरबारमा जारी आजको बैठकमा पनि न्यायपरिषद् सदस्यहरुको अनुपस्थितिको विषयलाई लिएर सभासद्हरुले आलोचना गरिरहेका छन् । समितिले बोलाएको बेला परिषदका सदस्य नआएको भन्दै सत्तारुढ एमाले र प्रमुख प्रतिपक्षी एकीकृत माओवादीले सिफारिस गरिएका सबै नाम फिर्ता गर्नुपर्ने बताएका छन् भने कांग्रेसले सुनुवाइ नगरी जस्ताको त्यस्तै फिर्ता गर्न नसकिने बताउदै आएको छ । सर्वोच्च अदालतले परिषदका सदस्यहरु समितिमा जानुनपर्ने र जवाफ दिनसमेत नपर्ने अन्तरिम आदेश जारी गरेपछि परिषद् सदस्यहरु संसदीय सुनुवाइ विशेष समितिमा नगएका हुन् । आजको बैठकमा सिफारिसमा परेका न्यायाधीशहरुको सुनुवाइका लागि मिति तोक्ने तयारी गरिएको छ । तर, एमाले र एमाओवादीका सभासद्हरुले पुनर्विचारका लागि सिफारिसलाई पुन: न्यायपरिषद्मा पठाउनुपर्ने प्रस्ताव गरेका छन् ।