जेठ ४, काठमाडौ– फ्रान्सको राजधानी पेरिसमा जारी अफ्रिकी नेताहरुको बैठकले नाइजेरियाको इश्लामिक चरपन्थी संगठन बोको हरामविरुद्ध युद्ध गर्ने घोषणा गरेको छ । फ्रान्सका राष्ट्रपति फ्रान्कोइस होल्याण्डले आह्वान गरेको बैठकमा अफ्रिकी देशका नेताहरुले यस्तो घोषणा गरेका हुन् । गत महिना बोको हरामले नाइजेरियाको उत्तरपूर्वी इलाकाबाट २ सय २३ स्कुले छात्राहरुलाई अपहरण गरेको थियो । बोको हरामले नाइजेरियाका विभिन्न सहरहरुमा हमला पनि जारी राखेको छ । केही वर्षयता बोको हरामको हमलाबाट नाइजेरियामा हजारौं नागरिकको मृत्यु भैसकेको छ । फ्रान्सेली राष्ट्रपति होल्याण्डले पेरिसमा आयोजना गरेको बैठकमा नाइजेरियाका राष्ट्रपति गुडलक जोनाथनसहित बेनिन, नाइजर तथा चाडका राष्ट्रपतिको उपस्थिति थियो ।
