अनुमति दिन ढिलाइ गर्दा विद्यार्थी भर्नामा अन्योल

वैसाख १०,नवलपरासी– जिल्ला शिक्षा कार्यालयले अनुमति दिन ढिलाइ गर्दा उपल्लो कक्षामा पास भएर जाने विद्यार्थीलाई भर्ना गर्न अन्योल भएको गुनासो नवलपरासीका सामुदायिक विद्यालयले गरेका छन् । नयाा शैक्षिकसत्र सुरु भइसक्दा पनि माग गरिएको माथिल्लो कक्षा अनुमति दिन जिल्ला शिक्षा समितिले ढिलाइ गर्दा विद्यार्थीको पठनपाठनमा समेत समस्या भएको विभिन्न विद्यालयका प्रधानाध्यापकले बताएका छन् । जिल्लामा माथिल्लो कक्षा सञ्चालनका लागि ४१ सामुदायिक विद्यालयले अनुमति माग गरेको सहायक शिक्षा अधिकारी नगेन्द्रप्रसाद रेग्मीले बताउनुभयो । कक्षा १, ६ र ९ का लागि क्षेत्रीय शिक्षा निर्देशनालयले स्वीकृति दिनुपर्ने भएकाले फाइल पठाए पनि अनुमति नआएको रेग्मीको भनाइ छ । जिल्लामा ७५ उच्च मावि, ६३ मावि, ११५ निमावि र २६१ वटा प्रावि रहेका छन् । यसैबीच नियम विपरीत माथिल्लो कक्षा सञ्चालन गरेको भन्दै निजी विद्यालयले माग गरेको १२१ विद्यालयको कक्षा सञ्चालनको अनुमति पनि रोकेको छ । शिक्षा कार्यालयले अनुमति रोके पनि नवलपरासीका अधिकांश निजी विद्यालयले बिना अनुमति माथिल्लो कक्षामा धमाधम विद्यार्थी भर्ना गरिरहेको पाइएको छ ।