रथ तान्दा ढुङगा हानाहान, ११ जना घाइते

चैत २८, काठमाण्डौ– बिस्केट जात्राको पहिलो दिन गए राती भैरबको रथ तान्ने क्रममा ११ जना घाइते भएका छन् । रथ तान्दा रथले किचेर, भीडमा चेपिएर र ढुङगा हानाहान हुदा उनीहरु घाइते भएका हुन् । घाइतेमध्ये भक्तपुर नगरपालिका १ च्यामासिंहका २१ वर्षका बिष्णु प्रजापतिको भक्तपुर अस्पतालमा उपचार हुन नसकेपछि मध्यपुर अस्पताल पठाइएको छ । अरु घाइतेको भक्तपुर अस्पतालमा उपचार गरी घर पठाइएको अस्पतालका प्रशासन प्रमुख कृष्णहरि गेलालले जानकारी दिनुभये । साझ ६ बजे तौमढीबाट भैरबको रथ तान्ने क्रममा माथिल्लो टोलका बासिन्दाले आफ्नो टोलतिर रथ तानेपछि तल्लो टोलका वासिन्दाले फेरि तानेर बंशगोपालसम्म झारेका थिए । रथ बंशगोपाल पुगेपछि स्थानीयको एक घरमा रथ ठोक्किएर क्षति पुगे लगत्तै तल्लो र माथिल्लो टोलका वासिन्दाबिच ढुङगा हानाहान भएको थियो । मध्यराती १२ बजेसम्म ढुङगा हानाहान भएपछि प्रहरीले हस्तक्षेप गरी स्थितिलाई नियन्त्रणमा लिएको थियो । रथ तान्ने क्रममा रथले ठोक्किएर ग:हिटीबाट पोटरी स्क्वायर जाने चोकमा रहेको सत्तल पाटी समेत भत्किएको छ । भक्तपुरमा आठ रात नौ दिनसम्म मनाइने यो जात्रामा गत वर्ष ३ जनाको ज्यान गएको थियो भने १२ जना भन्दा बढी घाइते भएको थिए ।