चैत्र २५, नुवाकोट– नुवाकोट र रसुवामा भएका छुट्टाछुट्टै घटनामा दुई जनाको मृत्यु भएको छ । नुवाकोटमा करेण्ट लागेर र रसुवामा लेक लाग्दा एक–एकजनाको मृत्यु भएको हो । नुवाकोटको विदुर नगरपालिका र चारघरे गाविसको सीमाना डाडागैरामा विद्युतको हाइभोल्टेजको करेण्ट लागेर चारघरे– ५ का ५० वर्षीय रामप्रसाद रिमालको घटनास्थलमै मृत्यु भएको हो । ११ हजार भोल्टेजको विद्युतको लाइनबाट चुडिएको तारले रिमाललाई करेण्ट लाग्दा घटनास्थलमा नै मृत्यु भएको नुवाकोट प्रहरीले जनाएको छ । विद्युत तार चुडिएको लामो समयसम्म पनि मर्मत नगर्नु विद्युत प्राधिकरणको लापरवाही भन्दै दुर्घटना पछि स्थानीयवासीले घटनास्थलबाट शव उठाउन दिएका छैनन् । घटनाको बिरोधमा स्थानीयले त्रिशुली बजारमा विरोध प्रदर्शन समेत गरेका छन् । यस्तै, रसुवाको लाङटाङ घुम्न गएका काठमाडौ बनस्थलीका २४ वर्षीय सीताराम कार्कीको लेक लागेर मृत्यु भएको छ । स्याफ्रुवेसी गाविसको लाङटाङ खोलामा पुग्दा अत्याधिक चिसोले कार्कीको मृत्यु भएको रसुवा प्रहरीले जनाएको छ ।
